Det er pølser til fest og pølser til middag og pølser på grillen. Gjerne innpakka i eit pølsebrød av loff. Og barna er fornøgde utan å tenke vitamin og mineral og næringsrik mat. Og foreldra tenkjer enkelt og lettvindt.

Eg trur foreldre generelt ønskjer å gi barna god mat, men i kappløp med tida og travle dagar blir det ofte kjappe middagar kjøpt halvferdige for å bli fort ferdig. Og gjerne simpel kvalitet fordi alternativet er for dyrt. Og samfunnet gjer ingenting. Og det er mitt poeng her. Eg meiner det er eit samfunns ansvar å legge til rette slik at foreldra får tid å gi barna sine sunn og næringsrik mat. For slik det fungerer no er ofte ekte og naturleg mat både lite tilgjengeleg og for kostbart. I dag er det butikk-kjedene som styrer kva mat barna skal få. Men myndighetene bør legge til rette for rein og naturleg mat, eller økologisk mat som det kallas for å gjera det spesielt. Giftsprøyta mat er farleg for alle, men spesielt for små barn. Vi anar ikkje konsekvensane på lang sikt. Så vidt eg veit får barna giftsprøyta banan og agurk i barnehagen. Og går vi litt i detalj på for eksempel agurk, eller rosiner for den saks skuld, og får vite kor mange ulike giftige kjemikaliar dei inneheldt, så er det ingen normale vaksne som har hjarte til å gi dette til små barn.

Vi lever i eit samfunn med «full fart» foreldre og mat proppfull av kjemikaliar. Der foreldra er sjanselause til å skape endring så lenge samfunnet manglar vilje til å støtte og legge til rette for naturleg mat. Det bør vera like lettvindt og enkelt og billig å gi næringsrik mat som det er å stappe pølser i barna. I eit friskt samfunn ligg forholda til rette slik at alle barn får frisk naturleg sunn mat kvar dag.